Kaixo irakurle!
Konturatu gabe bigarren astea ere egin dut
Irlandako lurretan, nola pasatzen den denbora!
Aste honetako gauzarik esanguratsuena
praktiken hasiera da dudarik gabe. Astelehenean jai eduki ondoren, hurrengo
egunean Celtic Intership enpresan
nengoen hitzartuta hurrengo hiru hilabeteetan nire lantokia izango dena
ezagutzeko. Bertako arduradunak kotxean eraman ninduen, lehenago lekua
ezagutzen banuen ere, etxetik 15 minutu eskasera baitago.
Zuek pixka bat kokatzeko, nire enpresaren azalpen
txiki bat egingo dut. Berau, mota guztietako edariak saltzen dituen enpresa
txikia da. Hauek, denda, pub, jatetxe, hotel eta beste hainbat negoziori
edariak hornitzeaz arduratzen dira. Gainera, denda ezberdinak dituzte hirian
zehar edari hauek azken kontsumitzaileari ere saltzeko. Lau talde nagusitan
banatu daitezke edari hauek: Ardoak, garagardoak, likoreak eta xanpainak.
Nik, bertako bulegoan egingo dut lan, bulego
zaharra eta nahiko hotza, azken finean bulego hau etxe zahar batean finkatua
baitago. Aste honetan, lankideak eta lantokia ezagutu ostean, datu baseak
egitea izan da nire lan bakarrenetarikoa. Denda, jatetxe eta hotel ezberdinen
datuak hartu eta Excel orrietan
moldatu. Nazioarteko Merkataritzako ikaslea izan naizen aldetik, honek, ez du
zerikusirik nik egin beharko nukeen lanarekin, baina, tira, praktikak dira, ez
naiz zorrotzegia izango.
Lanetik irteterakoan, aste barruko ekintzak ez
dira oso esanguratsuak izan. Erosketak egin, etxea garbitu, korrika egin… Hala
ere, esan beharra daukat gure “Village” honetan badagoela hotel moduko bat eta
bertan gimnasioa, igerilekua, sauna eta jacuzzia daudela. Astean birritan eta
ordu batzuez dohainik daukagu sarrera, beraz, asteazkenean, korrika egin ostean
bertara gerturatu nintzen jacuzziaz eta saunaz pixka bat gozatzera. Lagunok,
nire helburua ez da inbidiarik ematea, blog honetan errealitatea besterik ez
dut kontatzen!
Asteburua iristeko zain egoten gara leku
berriak ezagutzeko. Larunbatean, nire kabuz, Corkeko periferia edo kanpoaldea
ezagutzera irten nintzen. Arropa erosoa, motxila bizkarrean, erreferentziarik
ez eta abenturara! Nire helburua itsasoaren sarrera gertuagotik ikustea zen.
Zuek ideia bat egiteko, Cork Bilboren itxurakoa da geografikoki, hau da,
kostaldean egon ez arren, itsasoa ia barruraino sartzen da. Beraz, nire xedea
barnerago joatean zen. Horretarako, Google Maps-ekin pixka bat orientatu eta
markatzen zidan bidetik abiatu nintzen. Nire ezusterako, autoek erabiltzen
zuten errepide berberetatik joan behar nintzen eta eskerrak espaloia bazutela!
Ordu bete ibili ondoren Douglas izeneko herritxo batera iritsi nintzen. Orduan,
jarraitzeko duda izan nuen, bideren bat gaizki hartu eta beste herriren batean
azaldu nintekeen eta! Horregatik, burua hotz mantendu eta buelta ematea erabaki
nuen. Ondorengo irudian ikusiko duzuen bezala, bide zuzenetik nioan eta 2-3km
eskas geratzen zitzaizkidan nire helmugara iristeko. Zer egingo diogu ba,
hurrengo batean lortuko dut! Hiria beste pixka bat arakatu eta bazkalordurako
etxean nengoen berriz ere. Arratsalde-gaba partean garagardo eta pizzak batzuk
hartu eta berandutu baino lehen lotara!
 |
| A-tik B-ra egin nuen ibilbidea. Itsasoa gertu zegoen. |
Lotara diot, gaur, igandean, Cobh herria
ezagutzen izan baikara. Cobh, Corketik 25 km. ingurura dagoen herritxoa da,
Titanic itsasontziaren azken geltokia izateagatik ezagun dena. Goizean goiz
esnatu, trena hartu eta ordu erdi eskasean bertara iritsi gara. Egia esan,
eguraldia ez dugu lagun izan. Ateri bazegoen ere, zerua lainotuta ikus zitekeen
eta demaseko hotza. Tenperaturak 2º inguru markatzen zituen eta sentsazio
termikoa, aldiz, Irlandako haize bortitzari eskerrak, -3º graduren bueltan
zebilen. Bertan, itsas portua, herriaren Katedrala, kaleak eta beste zenbait
txoko bisitatu ditugu. Titanic-ari buruz museo bat badago, baina gaur ez sartzea
erabaki dugu. Egia esan, Cobhek nahiko hotz utzi gaitu, ez eguraldiagatik
zehazki, gehiago espero genuen eta. Esan
beharra dago udako herriaren itxura duela, garai honetan kruzero handiak eta
itsasontzi asko aurki daitezke eta. Udaberrian, ostera, ordu pare bat nahikoa
dira herri hau ezagutzeko.
 |
| Ken Station Cork City |
 |
| Cobhera joateko trena |
 |
| Cobheko portua |
 |
| Cobh Cathedral |
 |
| Cobheko muelle zahar bat |
 |
| Titanic-aren museoa |
 |
| Portu zaharra |
 |
| Cobh goikaldetik |
 |
| Haulbowline Island |
 |
| Treneko bistak |
Beraz, bazkal aurretik bueltarako bidea hartu
dugu. Bazkaldu eta astean zehar bota ezin dudan siesta egin dut, hau luxua! Arratsaldea
blog hau berritzeko erabiltzen ari naiz eta beranduago jacuzzia eta sauna
aprobetxatuko ditut, astea ondo bukatzeko, badakizue!
Honenbestez, hauxe da nire bigarren asteak
eman duena. Aitortu beharra daukat, hemen bi aste eraman arren, etxetik kanpora
egiten dudan denbora handiena dela (eta geratzen zaidana!). Gustura nago, gauza
berriak ikasten, beraz, ez arduratu!
Besterik gabe, hurrengo astera arte!
ONDO IZAN!!!
P.D: Jarraitu Beñat Konde ta bere tokaioaren ibilerak http://blogak.com/txeko helbidean, bere ideari esker zabaldu dut blog hau eta!
